الموصل الحدباء

المنتدى عراقي موصلي
 
الرئيسيةالتسجيلدخول

شاطر | 
 

 مصلاوي مغترب عاد حديثا من الخارج

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
اشرف الطائي



ذكر
عدد الرسائل : 13
العمر : 26
تاريخ التسجيل : 01/01/2009

مُساهمةموضوع: مصلاوي مغترب عاد حديثا من الخارج   الجمعة يناير 02, 2009 12:01 am

مصلاوي مغترب عاد حديثا من الخارج
سألو صديقو إيول دادا ليش رجعت للموصل هستا ؟
والوضع مثل تعغف ؟ أكفخ على غاسي؟؟؟

المغترب : إيول دادا أعغف كشي والله بس ما طيق أنسى
إذا كنت أطيق أنسى كل الدني اشون أطيق أنسى :
وقفي على جسغ الحديد ابيوم نيساني والإنتعاش بالأنسام الشماليي
وقدامك طيغ أبو حمد يغوص بالأعماق بلكي يصيدلو فغد تقيي لو بنيي
ونا علجسغ...أطيلع يمين أتذكر أيام الكب وحديقة الملك غازي وذكريات الشباب والأحلام الفنطازيي
أطيلع للشمال وأتذكر أيام المراهقة والسباحة بشط الجومي وشط الزعغتيي
وآخر كم خطوي قبل ما يخلص الجسغ أسمع هدير الشلال , وأشم غيحتو الزكيي
أشون أنسى كم كيم أزنيف وبيتمش طولي بمقهى أبو داهي يم جيمع الخاتون ودكيكين التحفجيي؟؟
أشون أنسى حوش البيعة والنجيغين والسمك المقلي ورنة سنيدين الحديدين وغيحة البصل الأخضغ ابسوق الخضاغجيي؟؟
أشون أنسى دهيليز باب السراي وجيمع الشيخ عبدال وجيمع الباشا وأبو جبن البيزهيم سوق البغضاعجيي؟؟
منو يهلو ينسى عبق سوق العطيغين وسوق العتمي وتكرمون سوق الإيمنجيي؟؟
وكباب سيد بكر وفشافيش حميد شواي وقلية أبو شهاب ابسوق القوندرجيي؟
منو ينسى الكشك والمجدغة وحامض شلغم والمسقعة وإيبرغ مفلش والبورانيي واللبنيي والزبيبيي؟؟
منو ينسى باب لكش وباب الطوب والمكاوي وغاس الكوغ ودكة بركة وشك صويان وحضيغة السادي وحمام المنقوشي والخاتونيي؟؟

جاوبني بالله عليك...أكوأطيب من إستكان نوم بصغة.. وأنت ملفوف بالدويشم ابحمام الصالحيي؟؟
على بختك أشون أنسى ؟؟؟ ليش أكو مصلاوي يطيق يتخلى عن الحلو والطحينيي؟؟؟


وبعد اسابيع من الوصول... التقى الاثنين معا

الصديق : ها اشونك هسعتا أبويي ؟اغشعت الكرايب والاحباب؟؟؟
احكيلنا اشكو عندك اخبار ؟يا اخويي من حكيت عالموصل نبهتني انت عليها وغيرت رايي وبعد ما اغيد اغادر العراق ولا الموصل . بس اغشعك هم ما مرتاح بعد ماشفت الموصل واعملتلك فرا ؟؟؟

المغترب : يول ابن المفجوعة اغشع الدني مقلوبي قلب ..يولو انتم اشون عيشين....الشوارع مالكم حفغ. الاسواق زبل. الحمامات ما بيها احد.البيوت عزا مال الله .الوجوه صفغا ..خالي مشلول من الهبطة.. خالتي ثما اعوج من الخوف.. امي عزا العزاها كن اخرفت وما تعغفني ..ابويي كئابة.. اخويي كن طلق مغتو.. اخويي اللاخ كن جن ..جيرانا كن انتبش ..جيرانا اللاخ ابسوريا.. الماي بالشافعات.. مراكز الشرطة امفلشي .. الكاز والغاز والبنزين مصيبة كبرى..كنتم اتقولون ابو محمد..هسعتا اتقولون ابومحمد الكغدي وفاطمي العفريي وسالم الشبكي وسمية ...ووووووووووو...يول يابا اش هل فجعة هاي... وليش اي ويحد اغشعو يرزلني هذا يقول عليي ماتفتهم وهذا غبي وهذاك مطفي ويقولي اش رجعك هستا ...ما اتقلي اشصاغ بيكم انتم اهل الموصل ؟؟؟

الصديق : شهيتني ما اترك الموصل وبعد ما حكيت اللي حكيتو جوابي الك مع مشتها قويي... يا غبي وبركيل وطرطميس وطمامي اللي اطمك وطم اهلك ويادنكة دبنك ومجنون وطرن وبومي وغماد وغمدي ابغاسك واعمى العين ووووووووووووووو...ارتاحيت هسعتا؟ وهسا انت ظل بالموصل وانا دغوح..لما قتولك اشجابك اعملتلي الموصل نانسي عجرم وخليتني اندم على تفكيري بالسفر وهسا انت ظل واتواغا وانفجع بالموصل وانا اشلع على أي مكان واقعد بيها(مثل اردن سوريا مصر ) واغشع وج ربي الواحد القهار وانذل اهنوك واحسن الليي من الموزاييك اللي دوخو غاسنا بينو ... خبصونا بالهلموزاييك اللي ايزحلق !!

المغترب : يمعود اشقلتو انت سالتني وجاوبتوك ؟

الصديق : انت شهيتني على كل شي ومن شهيتني غحتو افتريتو كل المكانات اللي قلتلي عليها وما اغشعتو الا دني سودا امصخما ومن صخم الله وجك..

المغترب : يمعود لاتتعصب ما صاغ شي خلي انا وانت انغوح مرت اللاخ وانهاجر ؟

وفي النهاية : وخطيي وهيم قيتناقشون للهجرة وجتم فجعة كبيغي وانفجرت يممم مفخخة
والى هسعتا ايدوغون على وصلاتم وما لقو منا شي ؟؟؟
الرجوع الى أعلى الصفحة اذهب الى الأسفل
 
مصلاوي مغترب عاد حديثا من الخارج
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الموصل الحدباء :: المنتديات العامة :: منتدى المغتربين-
انتقل الى: